Зәй игенчеләре бөртекле культуралар суктыруга кереште

Бүген Зәй районында 2023 ел урып-җыю кампаниясе башланды. Беренчеләрдән булып арпа суктыруга «Восток» агрофирмасының Александр Бистәсе бүлекчәсе кереште. Эш «Билал» мәчете имамы Илсур хәзрәт Әюпов, район башлыгы Разиф Кәримов һәм район активы фатихасы белән башланды. Разиф Гали улы игенчеләргә әлеге мөһим вакыйга уңаеннан котлау сүзләрен җиткерде, игеннәрне югалтуларсыз һәм кыска вакыт эчендә җыеп алу өчен мөмкин булганның барысын да эшләргә чакырды. Бүгенге көндә бөртеклеләрнең дымлылыгы 16,8% тәшкил итә, контроль суктыру якынча уңышның гектарыннан 23 центнер булуын күрсәткән. Бүген шулай ук «Зәй» агрофирмасының «Аксар» бүлекчәсе һәм «Зәй шикәре» агрофирмасының «Сәвәләй» бүлекчәсе көзге бодай суктыра башлаячак. Гомумән алганда, аграрийлар яхшы нәтиҗәгә өметләнә. Урып-җыюда механизаторларга һәм авыл хуҗалыгы белгечләренә уңышлы эш телибез.