Зәйдә Икътисади совет утырышы үткәрелде

Бүген хакимият бинасының зур залында район башлыгы Р.Г. Кәримов Икътисади советның чираттагы утырышын уздырды. Разиф Гали улы катнашучыларны 2023 елның беренче яртыеллыгында районның икътисади күрсәткечләре, шәһәр һәм районның эре предприятиеләрендәге эшләрнең торышы белән таныштырды. Көн тәртибе буенча «2023 елның 5 аенда «ЖилЭнергоСервис» ҖЧҖ эшчәнлегенең төп нәтиҗәләре һәм 2023 елга перспективалы планнар» доклады тыңланды. Мәгълүматны оешма директоры Георгий Владимирович Тихонов җиткерде. Предприятие, күпфатирлы торак йортларда йорт эчендәге электр челтәрләренә техник хезмәт күрсәтүдән тыш, түбәндәге эш төрләрен башкара: торак йортларны электр белән тәэмин итү системасын капиталь ремонтлау; юридик һәм физик затларга хезмәт күрсәтү, шул исәптән: электромонтаж эшләре; электр энергиясен исәпкә алу приборларын урнаштыру һәм пломбалау; фатир эчендәге электр челтәрләрен техник тикшерү; фатир эчендәге электр челтәрләрен ремонтлау, тулысынча алмаштыруны да кертеп; урамнарны яктырту. Докладчы чыгыш ясаганнан соң, Икътисади совет әгъзалары фикер алышты. Утырышка йомгак ясап, район башлыгы Р.Г. Кәримов директорга эшнең уңайлы итеп оештырылуына рәхмәт белдерде һәм алга таба да уңышлар теләде.