Зәйдә урып-җыю техникасының әзерлеген тикшерделәр

Бүген районда традицион комбайннар парады узды. Район башлыгы Р.Г. Кәримов рәислегендәге махсус комиссия авыл хуҗалыгы техникасының 2023 елгы урып-җыюга әзерлеген тикшерде. Комиссия эшендә авыл хуҗалыгы идарәсе, “Агросила Логистика” АҖ һәм агрофирмалар, Россельхозцентр, Гостехнадзор белгечләре катнашты. Комиссия игътибарына ашлык җыю комбайннары, шулай ук салам әзерләү һәм ташу, туфрак эшкәртү техникасы, ашлык ташу өчен транспорт тәкъдим ителде. Тулаем алганда, бөртеклеләрне җыюга "Агросила" АҖнең 44 комбайны җәлеп ителәчәк. Комиссия Зәй районының барлык агрофирмаларында график буенча эшләде. Механизаторлар һәм белгечләр белән әңгәмә вакытында район башлыгы Разиф Кәримов тарафыннан бөртекле һәм кузаклы культураларны кыска вакыт эчендә һәм югалтуларсыз җыю бурычы куелды. Урып-җыю техникасының әзерлеген билгеләгәндә герметиклык мөһим, моның өчен һәр комбайн автополог аша үткәрелде. "Эшләрне башкарганда янгын куркынычсызлыгы кагыйдәләренә һәм хезмәтне саклау мәсьәләләренә аерым игътибар бирергә кирәк", - дип ассызыклады Разиф Гали улы. Һәр отряд гадәттән тыш хәлләрдә куллану өчен туфрак эшкәртү агрегаты тагылган трактор һәм су ташучы машина белән комплектланган. Комиссия әгъзалары янгын сүндерү чаралары, дарулар җыелмасы һәм махсус киемнәр булу-булмавын тикшерделәр. Барлык хуҗалыкларда урып-җыю чорында "Агросила Сервис" АҖнең кирәкле җиһазлар һәм запас частьләр белән тәэмин ителгән күчмә ремонт бригадалары эшләячәк, моның өчен өстәмә рәвештә 5 махсуслаштырылган машина сатып алынган. Зәй игенчеләренә быел 38,5 мең мәйданнан уңыш җыярга туры киләчәк. Көзге культуралар чәчү структурасында -16,8 мең гектар, язгы культуралар -21,7 мең гектар, шул исәптән язгы бодай -6,4 мең гектар, арпа 11 мең гектар, бөртеккә кукуруз 1,3 мең гектар мәйданны били.