Зәйдә чыгарылыш сыйныф укучыларына мәктәпне тәмамлау турында аттестатлар тапшырылды

Бүген Зәй муниципаль районының 10 белем бирү учреждениесендә 11 нче сыйныфның 133 укучысын, район мәктәпләренең 9 нчы сыйныфын тәмамлаган 459 укучыны олы тормыш юлына озаттылар. Район башлыгы Кәримов Разиф Галиевич 6 нчы мәктәптә узган чарада катнашты. "Мәктәпне тәмамлау - һәр кеше тормышында мөһим чор. Сез, чыгарылыш сыйныф укучылары, барыгыз да мөстәкыйль, олы тормыш бусагасында басып торасыз. Ышанып әйтәм, уку елларында тупланган белемнәр тормышта үз-үзегезне камилләштерү һәм үз юлыгызны табуда ныклы нигез булыр. Сезнең бүгенге уңышларыгыз - районыбыз, республикабыз һәм илебезнең тотрыклылыгы һәм чәчәк атуы ул. Уртак тырышлык белән без бергә, һәр укучы белемен һәм сәләтен куллана алсын, тормышта үз урынын таба алсын өчен барысын да эшләячәкбез. Югары уку йортларын тәмамлаганнан соң сез туган ягыгызга кайтырсыз, үзегезнең яраткан эшегезне туган җирегездә табарсыз, районыбызны үстерү, аны төзекләндерү, гореф-гадәтләрен саклауда үз өлешегезне кертерсез,- дип ышанабыз диде район башлыгы балаларны котлап. Шулай ук бүген ел чыгарылыш укучылары өчен «Энергетик» мәдәният йорты мәйданында «Йолдызлы кичә» бәйрәм программасы узды, анда район җитәкчеләре «Алтын фонд», «Олимпия резервлары», «Ватанга хезмәт итәм», «Илһам һәм иҗат» һәм «Лидер» номинацияләрендә җиңүчеләрне бүләкләделәр. Барлык чыгарылыш сыйныф укучыларына уңышлар, нык сәламәтлек, иң кыю планнарны тормышка ашыруларын телибез!