Район башлыгы терлек азыгы әзерләүнең барышы белән танышты

Бүген Зәй муниципаль районы башлыгы Р.Г. Кәримов авыл хуҗалыгы идарәсе, зооветеринария һәм агрофирма белгечләре белән берлектә авыл хуҗалыгы бүлекчәләрендә терлек азыгы әзерләүнең барышы белән танышып чыкты. Беренче чиратта "Нива", "Чыбыклы" фермаларында, "Дурт-Мунча" комплексында силос-сенаж базларын карадылар. Район башлыгы Разиф Гали улы азык әзерләүдә катнашучы механизаторлар белән очрашып сөйләште, сенаж массасын төеп тутыру сыйфатын тикшерде. Коры һава шартлары һәм күпьеллык үләннәрнең тиз өлгерүе сәбәпле район башлыгы эш темпларын тизләтергә, консервантлар кулланып сенаж салу технологиясен төгәл үтәргә өндәде. Бүгенге көнгә 11,6 мең тонна сенаж әзерләнгән, бу планның 55% тәшкил итә. Районда сенаж салу буенча 3 комплекслы звено һәм печән әзерләү буенча бер звено оештырылган. Барысы да кирәкле күләмдә техника җыелмасы белән комплектланган (чабу, әйләндерү, ваклап җыю, ташу, төеп тутыру). Тикшерүдә катнашучылар терлек азыгы әзерләү процессы барган барлык нокталарда: кырларда, силос базларында булдылар. Сәфәр барышында пар кырларына дефекат кертү, сидераль парларны эшкәртү, шулай ук минераль ашламалар кертеп, шикәр чөгендере һәм кукурузны рәтара эшкәртү буенча эшләр каралды. Бар җирдә дә эш тиешле дәрәҗәдә оештырылган, район башлыгы һәм белгечләр тарафыннан җитешсезлекләр ачыкланмаган.