"Кызыл калфак" балалар бакчасында квест-уен үткәрелде

25 апрельдә Бөтенроссия "Эколятлар көне" билгеләп үтелә. Әлеге бәйрәм кысаларында, мәктәпкәчә яшьтәге балаларга экологик белем бирү, аларның җаваплы экологик тәртибен формалаштыру максатыннан, «Кызыл калфак» балалар бакчасында «Эколята-яшь табигатьне саклаучылар» урта һәм әзерлек төркемнәре өчен квест – уен үткәрелде. Балалар биремнәр үтәделәр ,табышмакларны бик теләп чиштеләр, уеннар уйнадылар. Тәрбияләнүчеләрнең аерым игътибары табигатьтәге чүп проблемасына җәлеп ителде, бу максат белән «Чүп җыю» уены үткәрелде, балалар табигатьтә үз-үзләрен тоту кагыйдәләре турында белемнәре белән уртаклаштылар, табигать тавышларын тыңладылар һәм аның килеп чыгышын билгеләделәр. Ә аннары, мәктәпкәчә учреждение территориясенә чыгып, педагог Айгөл Ринатовна җитәкчелегендә, яшь табигатьне саклаучылар коры агач ботакларын җыярга ярдәм иттеләр. Бергә эшләү өлкәннәрне һәм балаларны берләштерде, яхшы кәеф тудырды, ә иң мөһиме - һәркайда һәм һәркемгә ярдәм итәргә, табигать турында кайгырту теләге барлыкка килде.