Зәйлеләрне "Нефть туган урын" әдәби бәйгесендә катнашырга чакыралар

«Татнефть» хәйрия фонды, Татарстан Язучылар берлеге белән берлектә, нефтьчеләр һәм «Татнефть» турында иң яхшы хикәя һәм шигырьгә әдәби конкурс игълан итә. Республика күләмендәге әдәби конкурс Татарстанда нефть чыга башлауның 80 еллыгы, Ромашкино ятмасы табылуның 75 еллыгы уңаеннан оештырыла. Конкурс эшләре 1 марттан 10 июньгә кадәр Ruhiat@mail.ru. электрон адресына кабул ителә. Әдәби бәйгегә моңарчы матбугатта һәм төрле җыентыкта басылмаган, рус һәм татар телендә язылган әсәрләр кабул ителә. Катнашучыларга 18 яшь тулган булырга тиеш. Татарстан Язучылар берлеге әгъзалары да, мөстәкыйль язучылар да катнаша ала. Профессионаллар һәм һәвәскәрләр аерым номинацияләрдә каралачак. Лауреатларга дипломнар һәм акчалата призлар вәгъдә ителә. Иң яхшы әсәрләр махсус җыентыкта басылачак, оешманың корпоратив матбугат чараларында һәм сайтларында урын алачак. Белешмәләр өчен телефон: 8(8553) 373-951.