Запастагы ефрейтор Юрий Жаров "Батырлык өчен" медале белән бүләкләнде

Бүген "Энергетик" мәдәният сараенда дәүләт бүләген тапшыру тантанасы булды. Россия Федерациясе Президенты Указы белән хәрби бурычын үтәгәндәге сугышчан казанышлары өчен Донецк һәм Луганск Халык Республикаларында махсус хәрби операциядә катнашкан запастагы ефрейтор Жаров Юрий Анатольевич «Батырлык өчен» медале белән бүләкләнде. Чара Россия Федерациясе, Татарстан Республикасы һәм Зәй муниципаль районының дәүләт әләмнәрен кертүдән башланды. Чарада катнашучылар ЛНР һәм ДНР территориясендә хәрби бурычын үтәү барышында һәлак булган Дмитрий Милочкинны бер минутлык тынлык белән искә алдылар. Сәламләү сүзе белән район башлыгы Р.Г. Кәримов чыгыш ясады. Ул Ватан Геройлары Көнендә бүләк тапшыруның символик мәгънәгә ия булуын билгеләп үтте, Юрий Анатольевичка Ватан алдындагы бурычка тугры калуы өчен рәхмәт белдерде, чарада катнашучыларны бәйрәм белән котлады. - Быел илебез бу бәйрәмне катлаулы шартларда билгеләп үтә. Бүген безнең солдатлар, махсус хәрби операциядә катнашып, Россиянең иреген, намусын һәм абруен яклыйлар. Аларның һәркайсы Ватан герое булып тора. Без әлеге операциянең тиз арада тәмамлануын һәм барлык мобилизацияләнгән солдатлар һәм үз теләге белән хәрби операциядә катнашучыларның үз гаиләләренә, туган районнарына кайтуларын телибез, аларны яраталар һәм түземсезлек белән көтәләр,- диде Разиф Галиевич. Юрий Анатольевичка медальне район башлыгы Разиф Кәримов һәм шәһәр һәм район хәрби комиссары Айрат Әгъләмҗанов тапшырды. Алар запастагы ефрейторга уртак эшкә шәхси өлешен керткәне өчен рәхмәт белдерделәр һәм ныклы сәламәтлек һәм киләчәктә уңышлар теләделәр.