Зәйдә авыл хуҗалыгы хезмәт алдынгыларын хөрмәтләделәр

Бүген «Энергетик» мәдәният сараенда авыл хуҗалыгы хезмәткәрләре слеты булды. Тантаналы чарада район башлыгы Разиф Кәримов, Татарстан Республикасы Авыл хуҗалыгы һәм азык - төлек министры урынбасары Дмитрий Яшин, хөкүмәттән куратор-Татарстан Республикасының мәдәни мирас объектларын саклау комитеты рәисе Иван Гущин катнаштылар һәм авыл хезмәтчәннәрен һөнәри бәйрәмнәре белән котладылар. "Зәй районы Татарстанда авыл хуҗалыгы продукциясе җитештерү буенча алдынгы муниципалитетларның берсе булып тора. Район башлыгы, аның командасы һәм аграрийлары тырышлыгы белән сез куелган планканы киметмисез, беркайчан да бер урында тормыйсыз, эштә яңа алымнар эзлисез, сыйфатны яхшыртасыз һәм алынган продукция күләмен арттырасыз», - дип билгеләде Иван Николаевич. Шулай ук бәйрәм кунакларын «АГРОСИЛА» АҖнең "Чаллы элеваторы" ААҖ эшчәнлеге мәсьәләләре буенча генераль директор урынбасары Фәнис Газетдинов, Татарстан Республикасы Дәүләт Советы депутаты Илшат Әминов һәм башка рәсми затлар котлады. Районның алдынгы авыл хуҗалыгы хезмәткәрләре Россия, республика һәм район дәрәҗәсендәге бүләкләр белән бүләкләнделәр. «Зәй шикәре» агрофирмасы ҖЧҖ тракторчы –машинисты Марс Никодимов «Татарстан Республикасының атказанган механизаторы», «АГРОСИЛА» АҖ үсемлекчелек бүлегенең әйдәп баручы агрономы Ренат Әхмәтшин «Татарстан Республикасының атказанган агрономы» мактаулы исеменә лаек булдылар. "Россия шикәр сәнәгатенең мактаулы хезмәткәре» исеменә «Чыбыклы» һәм «Кадер» ҖК идарәчеләре Семен Агеев һәм Рашат Саматов лаек булды. ТР Министрлар Кабинетының Рәхмәт хаты «Агросила-логистика» ҖЧҖ тракторчы-машинисты Илдус Хәйруллинга бирелде. «Зәй шикәре агрофирмасы» ҖЧҖнең әйдәп баручы инженер –энергетигы Виктор Рязанов, «Восток агрофирмасы» ҖЧҖнең әйдәп баручы агрономы Инсаф Сафин, Авыл хуҗалыгы һәм азык-төлек идарәсенең җитештерү бүлеге консультанты Әлфия Билданова Татарстан Республикасы Авыл хуҗалыгы һәм азык-төлек министрлыгының Мактау грамотасы белән бүләкләнделәр. 6 кешегә район башлыгы Мактау грамотасы тапшырылды. Алдынгы хуҗалыклар җитәкчеләре, терлек азыгы әзерләү, шикәр чөгендерен җыю механизаторлары, машина белән саву операторлары акчалата премияләр белән бүләкләнде. 3500 тоннадан артык ашлык суктырган комбайнчыларны бүләкләү бәйрәмнең кульминациясе булды. Авыл хуҗалыгы хезмәткәрләрен бәйрәм дәвамында якташыбыз Ясмин, татар эстрадасы җырчысы Рөстәм Насыйбуллин, «Энергетик» мәдәният сараеның хореография һәм вокал коллективлары үзләренең матур чыгышлары белән сөендерделәр. Тантанада катнашучыларга хезмәтләре, уңышлары, крестьян һөнәренә тугрылыклары өчен рәхмәт белдерделәр, барысына да сәламәтлек, бәхет, гаилә иминлеге, тыныч күк йөзе һәм яңа хезмәт уңышлары теләделәр!