Зәйдә мәктәп укучыларының «Эзләү һәм казанышлар горизонтлары» I Республика фәнни-гамәли конференциясе узды

26 ноябрьдә 4нче мәктәп базасында укучыларның «Эзләү һәм казанышлар горизонтлары» I Республика фәнни-гамәли конференциясе узды. Беренче тапкыр конференция 2005нче елда оештырылган иде. Быел ул республика статусын алды. Зәй, Баулы, Бөгелмә, Сарман, Кукмара, Лениногорск, Чистай районнарының, шулай ук Алабуга, Әгерҗе һәм Яр Чаллы шәһәрләренең 80 нән артык сәләтле балалары биология, экология, туган якны өйрәнү, математика һәм информатика, рус һәм татар филологиясе, лингвистика юнәлешләре буенча үзләренең тикшеренү һәм проект эшләрен тәкъдим иттеләр. Балаларның эшләрен КФУның Алабуга институты укытучылары, Зәй ГРЭСЫ вәкилләре, Зәй туган якны өйрәнү музее, үзәк район хастаханәсе, үзәк шәһәр китапханәсе хезмәткәрләре, «Яңа Зәй» һәм «Зәй офыклары» газеталарының баш мөхәррирләре, Башкарма комитетының архив бүлеге башлыгы, мәктәп укучыларының кече фәннәр Академиясе укытучылары, районның әйдәп баручы педагогларыннан торган компетентлы жюри бәяләде. Барлык секцияләрдә дә җиңүчеләр һәм призерлар дипломнар белән бүләкләнделәр. Укучыларның «Эзләү һәм казанышлар горизонтлары» Республика фәнни-гамәли конференциясендә катнашучыларны котлыйбыз һәм яңа ачышлар ясауларын телибез!