Зәйдә Халыклар бердәмлеге көненә багышланган җиңел атлетика буенча ярышлар узды

Зәй балалары өчен «Энергия» стадионында көзге каникуллар кысаларында, җиңел атлетика буенча Халыклар бердәмлеге көненә багышланган ярышлар узды. Халыкны физик культура һәм спорт белән даими шөгыльләнүгә җәлеп итү, сәламәт яшәү рәвешен пропагандалау «Демография» милли проекты бурычларына керә. Чараны «Барс» спорт мәктәбе тренерлары оештырды. Ярышларда 86 спортчы катнашты: 39 малай һәм 47 кыз. Ярышлар 5 яшь төркеме буенча үткәрелде. "Каникулларда хәрәкәтсез утырырга вакыт юк! Безнең балалар ял итеп кенә калмыйлар, ярышларда да катнашалар. Балаларның чарадан алган тәэсирләре бик уңай, атмосфера дустанә иде, шул ук вакытта спорт рухы да көчле булды!"- диде җиңел атлетика буенча тәрбияләнүче Морозюк Раушания Наил кызының дәү әнисе. Ярышлар җиңел атлетиканы популярлаштыруга һәм үстерүгә, каникул вакытында балигъ булмаганнарның сәламәт һәм актив ялын нәтиҗәле оештыруга һәм перспективалы спортчыларны ачыклауга ярдәм итә.