Зәйдә укучыларга хокукый белем бирү буенча бердәм республика дәресе үткәрелде

Бүген Зәй политехник көллиятендә студентларга хокукый белем бирү кысаларында «Без үз гамәлләребез өчен җаваплы» дигән тематик дәрес узды, анда район башлыгы Р.Г. Кәримов катнашты. Студентлар белән очрашу вакытында Разиф Гали улы Зәй муниципаль районы мисалында җәмгыять тормышында законнарның роле һәм дәүләттә тормышны җайга салуда аларның урыны турында сөйләде. Очрашу азагында балаларга район башлыгына үзләрен кызыксындырган сорауларны бирү мөмкинлеге булды һәм сорауларга тулы җавап алынды. Татарстан Республикасы Дәүләт Советы депутаты Николай Нефедов катнашында 6 нчы мәктәптә дә укучыларга хокукый белем бирүнең шундый ук дәресе узды. Шәһәр һәм районның калган мәгариф учреждениеләрендә дәресләргә шәһәр һәм район Советлары депутатлары, авыл җирлекләре башлыклары чакырылган иде. Белем бирү дәресләре студентларга һәм өлкән сыйныф укучыларына төркемдә эшләү, үз карашларын ачык белдерү, әңгәмәләр үткәрү сәләтен үстерергә мөмкинлек бирде, шулай ук җаваплы карарлар кабул итү күнекмәләрен формалаштыруга һәм катлаулы ситуацияләрне анализлый белергә өйрәнүгә ярдәм итте. Укучыларны хокукый агарту буенча республика дәресләре, Дәүләт Советы Рәисе Фәрит Мөхәммәтшин инициативасы белән республиканың барлык мәгариф оешмаларында уза. Очрашу барышында депутатлар укучыларга хокук бозуларны профилактикалау һәм балигъ булмаганнарның җаваплылыгы турында сөйлиләр, балаларны аларның хокуклары һәм бурычлары белән таныштыралар.