«Татарстан Республикасы хатын-кыз исемнәре: тарих һәм бүгенге көн»

Бүген без «Татарстан Республикасының хатын-кыз исемнәре: тарих һәм бүгенге көн» рубрикасында Татарстанның атказанган мәдәният хезмәткәре (1983), Сөббух Рәфыйков исемендәге премия лауреаты (2001) Мәрданшина Рәзинә Салих кызы турында сөйләргә телибез. Мәрданшина Рәзинә Салих кызы 1926 елның 26 февралендә Ширәмәт (хәзерге Түбән Кама) районының Тоба авылында туган. Минзәлә педагогика училищесын тәмамлаганнан соң, 1941–45 елларда укытучы булып эшли. 1950 елдан башлап Рәзинә Салих кызы Зәй китапханә системасында хезмәт куя. 1958 елда аны Яңа Зәй поселогында ачылган беренче китапханәгә мөдир итеп куялар. 1977 елда райондагы китапханәләр барысы да Зәй үзәкләштерелгән китапханәләр системасына берләшәләр, аның җитәкчесе итеп Рәзинә Салиховна билгеләнә, һәм ул бу эшне 37 ел дәвамында, 2002 елда лаеклы ялга киткәнче алып бара. Рәзинә Мәрданшина фидакарьләрчә хезмәт куя, зур тату коллектив туплый, китапханәләргә йөрүче укучылар санын арттыруда, аларны яңа китаплар белән тәэмин итүдә ару-талу белмичә эшли. Зәй шәһәренең бүген Сөббух Рәфыйков исемен йөртүче китапханә бинасы да Рәзинә Салиховнаның тырышлыгы нәтиҗәсе. Ул берничә чакырылышта халык депутатларының район советына депутат итеп сайлана, озак еллар мәдәният хезмәткәрләре профсоюзының район комитетын җитәкли.Эш дәверендә Рәзинә Салих кызы күп санлы дәүләт бүләкләренә лаек була.