Зәйдә «Мәктәпкә җыенырга ярдәм ит» хәйрия акциясе узды

Бүген «Энергетик» мәдәният сарае каршында «Мәктәпкә җыенырга ярдәм ит» хәйрия акциясе узды. Күп балалы, аз керемле гаиләләрдәге балаларга мәктәп букчалары тапшырылды. Гадәттәгечә чарага шәһәр һәм район предприятиеләре, оешмалары һәм учреждениеләре җитәкчеләре һәм хезмәткәрләре дә кушылды. Акция беренче сыйныф укучыларына яңа уку елына әзерлек кысаларында адреслы ярдәм күрсәтү максатыннан үткәрелә. Быел 538 бала беренче тапкыр мәктәп парталары артына утырачак, шуларның 78е бүген мәктәп кирәк-яраклары тутырылган портфельләр алды. Тантанада район башлыгы Разиф Кәримов, район Башкарма комитеты җитәкчесе Эмиль Галиев, мәгариф идарәсе башлыгы Эрнст Сәфәргалиев, "Татэнерго" АҖ филиалы-Зәй ГРЭСы директоры урынбасары Рамил Галиуллин, "Таттелеком" җәмгяыте баш инженеры Марс Мәгъфуров һәм башкалар катнашты. Район башлыгы Разиф Кәримов акцияне үткәрүгә үз өлешләрен керткән оешмаларга, шәхси эшмәкәрләргә рәхмәт белдерде, ә беренче сыйныф укучыларына укуларында уңышлар теләде.