Зәйгә эш визиты белән Татарстан Республикасы Премьер-министры Алексей Песошин килде

Бүген Зәй районына эш визиты белән Татарстан Республикасы Премьер-министры Алексей Песошин килде. Татарстан Республикасы авыл хуҗалыгы һәм азык-төлек министры Марат Җәббаров белән бергә ул урып-җыю кампаниясенең барышы белән танышты һәм җирле аграрийлар белән очрашты. Авыл хуҗалыгы предприятиеләре җитәкчеләре, авыл җирлекләре башлыклары һәм механизаторлар белән очрашу Чыбыклы авылы янында «Зәй шикәре» агрофирмасы кырында узды. Район башлыгы Разиф Кәримов кунакларга урып-җыю эшләренең барышы турында сөйләде. Бүгенге көндә 21,4 мең гектар мәйданда эш башкарылган, бу гомуми мәйданның 58% ын тәшкил итә. 105 мең тоннадан артык ашлык суктырылган. Уңыш республикада иң югары -49,2 ц/га. 20 августта район шикәр чөгендере казуга кереште. Барлыгы 173 мең тонна ашлык һәм 468 мең тонна шикәр чөгендере җыеп алу планлаштырыла. Шулай ук 15 августтан хуҗалыклар көзге арыш һәм көзге бодай чәчүгә дә керештеләр. Быел көзге культуралар өчен 18 мең гектардан артык мәйдан бүлеп бирелгән. ТР Премьер-министры Зәй районының авыл хуҗалыгы өлкәсендә лидерларның берсе булуын ассызыклады. "Урып-җыю темплары буенча да, уңыш буенча да сез - иң яхшылар арасында. Эре агрофирмалар, инвесторлар бар, көчле эшкәртү җайга салынган. Азык-төлек куркынычсызлыгы мәсьәләсе бүген беренче планга чыга. Барыгызга да хезмәтегез өчен рәхмәт белдерәсем килә", - диде Алексей Песошин. Премьер-министр капиталь ремонт ясалган "Светлячок" балалар бакчасында булды. Объект 1970 елда төзелгән, биредә ремонт эшләре узган ел ук башланган иде һәм бу елның июль ахырында тәмамланды. Балалар бакчасы 150 урынга, 8 төркемгә исәпләнгән. Шулай ук Алексей Песошин Россия Эчке эшләр министрлыгының Зәй районы буенча бүлегенең административ бинасын ачуда катнашты. Биредә ул Татарстан Республикасы Эчке эшләр министры Артем Хохорин белән бергә шәхси составны яңартылган бина һәм хезмәткәрләр өчен булдырылган яңа шартлар белән котлады, туган районыбыз һәм республика файдасына башкарган эшләрендә уңышлар теләде.