Зәй районында шикәр чөгендере казуга керештеләр

19 августта Зәй районы аграрийлары шикәр чөгендере казуга керештеләр. Район чөгендерчеләренә быел 8 мең 905 га мәйданнан шикәр чөгендерен җыеп аласы бар. Шикәр чөгендерен җыюда ROPA Tiger маркалы 14 чөгендер җыю комбайны һәм ROPA Maus маркалы 4 чөгендер төягеч эшләячәк. Һәр комбайн ике тәҗрибәле механизатор белән комплектланган, 3 тапкыр ашату оештырылган. Шикәр чөгендерен чыгару график нигезендә алып барыла, иртәгәдән шикәр заводы тулы куәткә эшли башлаячак. Зәй шикәр заводының куәте тәүлегенә 8 мең тоннага кадәр тамыразык эшкәртергә мөмкинлек бирә. Бүгенге көндә 3300 тонна чимал тапшырылган, уңыш гектарыннан 337 центнер тәшкил итә. Район чөгендер үстерүчеләре сентябрь башыннан казу эшне тәүлек әйләнә оештырырга планлаштыралар.