Гомер юллары буйлап җыр белән

Зәй муниципаль районының «Шатлык» халыкка социаль хезмәт күрсәтү комплекслы үзәгенең өйдә социаль хезмәт күрсәтү бүлегендә өлкән яшьтәге кешеләр белән эшләүдә инновацион технологияләрне – реабилитация ялын гамәлгә кертү һәм гамәлгә ашыру дәвам итә. Бу эшчәнлек Россия халыкларының мәдәни мирасы елына туры китерелгән һәм «Демография» милли проектының озак вакытлы карау системасының социаль пакетына кертелгән социаль – тернәкләндерү чараларының бер формасы булып тора. Зәй җире үзенең талантлары белән дан тота. Шуларның берсе - Зичәбаш авылында яшәүче Бойцов Степан Федотович, ул 2023 елның гыйнварында үзенең туксан җиденче туган көнен билгеләп үтәчәк. Шундый озын тормыш юлын үтүенә карамастан, Степан Федотовичның хәтере яхшы, зиһене ачык. Ул - кызыклы әңгәмәдәш, матур тавышлы һәм идеаль музыкаль ишетү сәләтенә ия кеше. Степан Федотовичның яраткан шөгыле - музыка коралларында уйнау һәм җырлау. Аның кулында баян виртуозлардан да ким яңгырамый, ә скрипка кыллары туган халкының көйләрен сыздыра. Степан Федотовичның музыка белеме юк. Ә музыкага кызыксынуы шулкадәр зур булган ки, ул үзлегеннән баянда һәм скрипка кебек катлаулы уен коралында уйнарга өйрәнә. Шуннан бирле баяннан да, скрипкадан да, җырдан да аерылмый. Степан Федотович-керәшен көйләрен саклаучы. Ул керәшен җырларын бик яхшы хәтерли һәм аларны үзе баянда уйнап, оста итеп башкара. Авылдашларын, җирле мәктәп укучыларын скрипкада бию көйләре башкарып сөендерә. Степан Федотовичны тыңлаучыларның берсе-аның социаль хезмәткәре Михайлова Татьяна Федоровна. Ул аның җырлавын да, уен коралларында уйнавын да бик теләп тыңлый, үзе дә кушылып җырлый. Ул Степан Федотовичка рух күтәренкелеге һәм зиһен ачыклыгын саклап калырга музыкага булган мәхәббәте ярдәм иткәнлегенә ышана. Ә оста үзе йөрәге тибүдән туктаганчы уйнаячагын һәм җырлаячагын әйтә. «Безгә җыр төзергә һәм яшәргә ярдәм итә...» дигән танылган совет җыры юлларын һәрвакыт искә ала.