Зәйдә Физкультурачы көнен бәйрәм иттеләр

Бүген "Энергия" стадионында «Физкультурачы көне – 2022» спорт бәйрәме узды. Әлеге чара «Спорт-яшәү нормасы» төбәк проектының «Демография» милли проекты максатларына ирешүгә - халыкны физик культура һәм спорт белән даими шөгыльләнүгә җәлеп итүгә, сәламәт яшәү рәвешен пропагандалауга юнәлдерелгән. Бәйрәм кунаклары өчен районның дүрт спорт мәктәбендә һәм спорт клубларында алып барыла торган спорт төрләре презентацияләре оештырылды. Актив гаиләләр ГТО фестивалендә катнаштылар. Шәһәр халкына һәм кунакларына төрле спорт төрләре буенча дәресләрне бер урында күрү, шулай ук муниципаль спорт мәктәпләренең ничек эшләвен белү мөмкинлеге бирелде. Ата-аналар физик культура һәм спорт өлкәсендә белгечләрдән консультацияләр ала, учреждениеләрнең спорт юнәлешләре белән таныша, аларның казанышларын, тренерлар составын, мәктәпләргә керү һәм дәресләр үткәрү шартлары белән таныша алдылар. Барлык Зәй халкын бәйрәм белән Зәй муниципаль районы башлыгы Кәримов Рәзиф Гали улы котлады. Тантаналы чарада шулай ук район Башкарма комитеты җитәкчесе Галиев Эмиль Эдуард улы, районның физик культура, спорт һәм туризм идарәсе башлыгы Әшрапов Илфат Зиннур улы, район башлыгының спорт буенча җәмәгать ярдәмчеләре – ТР чаңгы узышлары федерациясе вице-президенты Галиев Эдуард Шәйхенур улы һәм Россиянең атказанган тренеры Фәйзуллин Рәкыйп Нәҗип улы катнашты. Бәйрәм тантанасында физик культура өлкәсе хезмәткәрләрен, физкультура хәрәкәте активистларын, спорт ветераннарын, Россия дәрәҗәсендәге ярышларда иң югары нәтиҗәләргә ирешкән спортчыларны һәм аларның тренерларын бүләкләделәр. Бәйрәм төрле ярышлар белән дәвам итте. Спорт мәйданчыкларында пляж волейболы буенча һәвәскәрләр командалары арасында район беренчелеге, предприятие, оешма һәм учреждениеләр командалары арасында җиңел атлетика эстафетасы, һәвәскәрләр командалары арасында футбол буенча турнир (8х8) узды.