Кечкенә зәйлеләр Халыкара светофор көнен билгеләп үттеләр

Ел саен 5 августта Халыкара светофор көне билгеләп үтелә. Бу дата 1914 елда Кливленд шәһәрендә беренче автоматик светофор урнаштыруга багышланган. 9 август көнне Үзәк китапханәдә «Уймак кыз» һәм «Алтынчәч» балалар бакчасында тәрбияләнүче балалар «Акыллы светофор» дип аталган танып-белү сәгатендә катнаштылар. Бу бәйрәм балаларның һәм өлкәннәрнең игътибарын юл хәрәкәте куркынычсызлыгы проблемасына җәлеп итү өчен менә дигән мөмкинлек. Яшь китап укучылар светофорның тарихы белән таныштылар, юл йөрү кагыйдәләре турында шигырьләр тыңладылар, светофорчы биргән сорауларга җавап бирделәр, пазлар җыйдылар, «Светофорны җый», «Светофор сигналлары», «Билгене ата» һ.б. конкурсларда бик теләп катнаштылар. Күңелле музыка астында балалар "Бер-береңне күчер" дигән хәрәкәтле уен уйнадылар. Чара ахырында балалар татлы бүләкләр алдылар. Алынган мәгълүмат балаларга тәртипле җәяүлеләр булырга һәм юлда күңелсезлекләрдән котылырга ярдәм итәр дип өметләнәбез.