Зәй делегациясе Татарстан башкаласында узган Сабантуйда катнашты

Район башлыгы Разиф Кәримов җитәкчелегендәге Зәй делегациясе Татарстан башкаласында узган Сабантуйда катнашты. Бүген Казанның төп мәйданчыгында – Мирный бистәсендәге каенлыкта Сабантуй узды. Икенче ел рәттән бәйрәмдә зәйлеләр районда яшәүче халыкларның көнкүрешен, гореф-гадәтләрен һәм мәдәниятен чагылдыра торган үз хуҗалыкларын тәкъдим иттеләр. Быел төп игътибар Зәйнең 370 еллыгына бирелде. Зәй ишегалдында Татарстан Республикасы Президенты Рөстәм Миңнеханов, Татарстан Республикасы Дәүләт Киңәшчесе Минтимер Шәймиев, Татарстан Республикасы Президенты Аппараты җитәкчесе урынбасары Игорь Савельев һәм башка мәртәбәле кунаклар булды, аларны Зәй районы башлыгы Разиф Кәримов сәламләде. Биредә булган кунаклар Зәй халкының кунакчыллыгына таң калдылар, Зәй коллективлары иҗаты, һөнәрчеләре, азык-төлек продуктлары җитештерүчеләр белән якыннан таныша алдылар. Зәй ишегалдында халык уеннарында катнашырга, батыр исеме өчен көрәшергә һәм приз оту мөмкинлеге дә булды. Биредә шулай ук кунакларны тәмле коймак белән сыйландылар һәм чын мунчада чабынырга чакырдылар.