“Россельхозцентр”ның Зәй бүлеге төп максатларының берсе - сәламәт һәм тотрыклы уңыш алу

Хәзерге вакытта «Россельхозцентр»ның Зәй бүлеге белгечләре авыл хуҗалыгы культуралары чәчүлекләрендә чүп үләннәренә, корткычларга, авыруларга фитомониторинг үткәрәләр. Җәйге чорда фитомониторинг үсемлекләр үсешенең һәр фазасында күп тапкырлар уздырыла. Белгечләр чәчүлекләрдә зарарлы нәрсәләр ачыкланганда, аграрийларга үсемлекләрне саклау чараларын үз вакытында эшкәртүне тәкъдим итә. “Безнең өстенлекле юнәлеш булып сәламәт һәм тотрыклы уңыш алу тора. Агросәнәгатьның заманча дәрәҗәсендә күпләп химик пестицидлар кулланып кына эшләү мөмкин түгел. Чәчүлекләрне эшкәрткәндә үсемлекләрне саклауда биологик средстволарны бак катнашмаларына кертү аеруча нәтиҗәле булып тора, чөнки алар авыруларга каршы тора һәм туфракның пычрануын киметә. Биопрепаратлар игелә торган культуралар уңышын һәм продукциянең сыйфатын арттыралар, туфрак микробиотын сәламәтләндерәләр”, -ди “Россельхозцентр”ның Зәй филиалы җитәкчесе Зәлия Тәхаутдинова. «Россельхозцентр»ның Зәй бүлеге һәм дәүләт сорт участогы белгечләре ел саен Сәвәләй авылындагы сортлар сынау участогында демонстрацион тәҗрибә туплыйлар. Чәчүдән алып, культураларны урып-җыюга кадәр, «Россельхозцентр» белгечләре тәҗрибә үткәрүдә актив катнашалар. Демонстрацион сынаулар схемалары нигезендә орлыкларны агулыйлар, үсемлекләрне саклау чаралары (гербицидлар, фунгицидлар, инсектицидлар) белән үз вакытында эшкәртәләр, чәчүлекләргә ашлама кертәләр. Сезон вакытында Зәлия Тәхаутдинова белән Зәй “Дәүләт сортлар сынау участогы” мөдире Руслан Рябов күп тапкырлар тәҗрибә кишәрлекләрен тикшерәләр. “Бак катнашмаларында биофунгицидлар, микробиоашламалар һәм үсеш регуляторлары куллану үсемлекләрнең үсешенә уңай йогынты ясавы берничә тапкыр исбатланды. Фермер хуҗалыклары арасында үсемлекләрне саклау чараларына өстенлек бирүче авыл хуҗалыгы товарлары җитештерүчеләренең саны арта баруы сөендерә. Алар арасында Ш. Касыймуллин, П. Степанов, О. Миңнеханов, И. Нигъмәтҗанов, Т. Игошин, А. Носов, Ф. Хәйретдинов, В. Ионов крестьян-фермер хуҗалыкларын аерым билгеләп үтәсе килә. Әлеге фермер хуҗалыклары биологик препаратлардан актив файдаланалар һәм үз хуҗалыкларында корткычлардан саклау өчен энтомофаглар (златоглазка, габробракон, макролофус) кулланалар”, -ди Зәлия Тәхаутдинова.