Зәйдә Р.Ш. Фәрдиев истәлегенә мемориаль такта ачылды

Бүген район үсешенә зур өлеш керткән күренекле эшлекле, 1999-2008 елларда Зәй районы хакимияте башлыгы Ринат Шәех улы Фәрдиев истәлеген мәңгеләштерүгә тагын бер адым ясалды: татар гимназиясе бинасында мемориаль такта ачылды. Мемориаль тактаны ачу тантанасында Зәй муниципаль районы башлыгы Кәримов Разиф Гали улы, Ринат Шәех улының тормыш иптәше Фәрдиева Фәридә Хафиз кызы, ветераннар-укытучылар, татар гимназиясе коллективы һәм укучылары катнашты. Ринат Шәехович безнең район тормышында үзенең якты эзен, онытылмас исемен калдырды. Ул киләчәк буыннар өчен менә дигән үрнәк, туган якның чын патриоты булды, якты киләчәккә чын күңелдән ышанды, моның өчен көчен кызганмады, армый-талмый хезмәт итте. Бүген куелган истәлек тактасы зәйлеләргә Ринат Шәеховичның якты истәлеге турында һәрвакыт искә төшерәчәк. Р.Ш. Фәрдиев исемендәге татар гимназиясе коллективы мемориаль такта куюда ярдәм иткән район җитәкчелегенә зур рәхмәт белдерә.