Зәйдә Икътисадый совет утырышы узды

Бүген хакимият бинасының кече залында район башлыгы Р.Г. Кәримов район икътисади советының чираттагы утырышын үткәрде. Анда "Зәй дәүләт ветеринария берләшмәсе" ДБУнең 2022 елның 1 кварталындагы эшчәнлегенең төп йомгаклары һәм 2022 елга перспектив планнары каралды. Ветеринария берләшмәсе җитәкчесе Фаот Исламов үз докладында бүгенге көндә учреждениенең финанс-икътисади хәле турында сөйләде һәм киләчәккә планнар белән таныштырды. Зәй районы ветеринария хезмәте эше терлекчелекнең тотрыклы эпизоотик иминлеген тәэмин итүгә, хайваннарның күпләп йогышлы авыруларын булдырмауга, район территориясен аның чикләрендә инфекциядән саклауга, ветеринария-санитария өлкәсендә куркынычсыз продукция чыгаруга юнәлдерелгән. Бу бурычларны хәл итү өчен Зәй ветеринария берләшмәсе составында биш ветеринария участогы һәм ветеринария лабораториясе эшли. Районда шәхси ярдәмче хуҗалыклар һәм КФХларга ярдәм күрсәтү буенча күчмә эш оештырылган. Ветеринария табиблары тоякларны чистарталар, биналарны дезинфекциялиләр, хайваннарны ясалма орлыкландыралар, шулай ук башка дәвалау-профилактика чаралары үткәрәләр. Җитәкченең чыгышын тыңлаганнан соң, Икътисади совет әгъзалары фикер алыштылар. Ахырда район башлыгы Разиф Кәримов уртача хезмәт хакын арттыру, күрсәтелә торган хезмәтләр өлкәсен арттыру, территорияләрне төзекләндерү буенча үз киңәшләрен бирде һәм районда Беккери чокырларының торышын аерым контрольдә тотарга чакырды.