Район башлыгы эш визиты белән "Зәй шикәре" ҖЧҖендә булды

Бүген район башлыгы Разиф Кәримов эш визиты белән «Зәй шикәре» ҖЧҖендә булды. «Агросила» АҖ генераль директорының шикәр заводы эшчәнлеге мәсьәләләре буенча урынбасары А.А. Трошин озатуында район башкарма комитеты җитәкчесенең икътисадый үсеш, сәнәгать, сәүдә һәм эшмәкәрлек буенча урынбасары Р. М. Архипова белән бергә Разиф Гали улы ИПШ-200 известь-яндыру мичен монтажлау буенча инвестицион эшләрнең барышы белән танышты. Капиталь кертемнәрнең гомуми суммасы 255 млн. сум тәшкил итә. Эшләр график буенча бара, мичне агымдагы ел чөгендерен эшкәртү сезонына эшләтеп җибәрү планлаштырыла. Бу мичне кулланышка кертү, беренчедән, заводның киләчәктә җитештерүчәнлеген арттырачак, икенчедән, шикәр чистартуга известь сөтен кирәкле күләмдә эшләп чыгару мөмкинлегенә юл ачыла. Шунысы куанычлы, район башлыгының шикәр заводына визиты районда шикәр чөгендерен чәчү тәмамлану вакытына туры килде. Һава шартлары катлаулы булуга карамастан, аграрийлар планны 100 процентка үтәделәр, техник культураның гомуми мәйданы 8905 га тәшкил итте. Чәчү технологиясе бөтен вак-төягенә кадәр исәпкә алынып төзелде һәм эш барышында аннан читкә тайпылуга юл куелмады. Аграрийлар табышлы елга өметләнә, мул уңыш көтәләр һәм югалтуларсыз урып-җыюга йөз тоталар. Ә бу, үз чиратында, шикәр заводы продукциясен җитештерү күләмнәрендә чагылыш табачак.