"Чүп-чарга икенче тормыш бүләк итик!" акциясе

Экологик агарту һәм табигать саклау чаралары кысаларында, "Кояшкай" балалар бакчасында тәрбияче Мингазова Гөлнур "Чүп-чарга икенче тормыш бүләк итик!" акциясе үткәрде. Акциянең максаты-балаларның һәм ата-аналарның игътибарын әйләнә-тирәлекне саклау проблемаларына җәлеп итү, үзгәртеп кору һәм кулланышта булган материаллардан яңа әйберләр ясау осталыгына ия булу. Калдыклар-кешеләр сәламәтлеге һәм әйләнә-тирә мохит өчен куркыныч тудыра торган иң заманча экологик проблемаларның берсе. Чүп-чар проблемасына дөрес мөнәсәбәт әйләнә-тирәне чистарак итәргә, планетаны пычранудан сакларга ярдәм итә ала. Калдыклардан эшләнмәләр ясап, кешеләр иҗади фикер йөртә, табигатькә сак карыйлар. Һәр кеше әйләнә-тирә мохитнең чисталыгын саклау өчен күп нәрсә эшли ала. Моның өчен бары теләк, бераз фантазия һәм кирәкмәгән әйберләр белән дөрес эш итә белү генә кирәк. Балалар бакчасында тәрбияләнүчеләр тирә-юньдә чиста һәм матур булуын, чүп түгел, табигатьне күрергә тели.