Зәйдә «Победный-2022» велоузышы узды

Ел саен 9 майда илебез Бөек Ватан сугышында совет халкының Җиңү көнен билгеләп үтә һәм һәркайсыбыз өчен бу дата үзенчәлекле мәгънәгә ия. Менә алтынчы ел инде Зәй муниципаль районында традицион бәйрәм чарасы - Җиңү көненә багышланган велоузыш уза. Быел да бу чарага 250 дән артык кеше җыелды. Велоузыш башланыр алдыннан "Кайгырту" ирекле хәрәкәте солдатлар батырлыгы истәлегенә Георгий тасмасы өләшү оештырды. Сәламләү сүзе белән велосипедчылар алдында Зәй муниципаль районы Башкарма комитеты җитәкчесе Галиев Эмиль Эдуардович чыгыш ясады. Традиция буенча зәйлеләр «Энергетик» мәдәният йортыннан старт алды. Шәһәр урамнары буйлап экипаж озатуында үтеп, катнашучылар Азатлык китерүче солдат һәйкәле янында финишка килделәр. Ахырдан велоузышта катнашучылар өчен кара һәм кызгылт сары төстәге һава шарлары тарату оештырылды. Төсләр очраклы гына сайлап алынмаган, алар Георгий тасмасы белән Җиңү символы буларак ассоциацияләнә. Велоузыш - үлемсез батырларга хөрмәт күрсәтү өчен тагын бер мөмкинлек, безнең җиңелмәс халык икәнебезне искә төшерү өчен тагын бер мөмкинлек, безнең Җиңүгә катнашы булганнарга "Рәхмәт!" дип әйтү өчен тагын бер мөмкинлек.