Зәйдә мәгариф оешмалары җитәкчеләре киңәшмәсе узды

Бүген 6 нчы мәктәптә район башлыгы Разиф Кәримов катнашында мәгариф оешмалары җитәкчеләренең «Мәгариф системасының актуаль мәсьәләләре» дигән темага киңәшмәсе узды. Киңәшмәдә катнашучылар алдында кереш сүз белән район башлыгы Разиф Кәримов чыгыш ясады. Ул катнашучыларны райондагы икътисади вәзгыять белән таныштырды, һәркемне көндәлек тырыш хезмәте белән аның алга таба үсешенә үз өлешен кертергә чакырды. Семинар темасы буенча төп доклад белән мәгариф идарәсе башлыгы Эрнст Сәфәргалиев чыкты. Шулай ук өстәмә докладчылар: 6 нчы мәктәп директоры Вәсилә Исрафилова, М.Х. Хәсәнов исемендәге Бигеш урта мәктәбе директоры урынбасары Рушания Ягъфәрова, 6 нчы мәктәпнең инглиз теле укытучысы Роза Гыйләҗева чыгышлары тыңланды. Балалар һәм яшүсмерләр арасында йогышлы авырулар санының торышы һәм яңа коронавирус йогышын профилактикалау турында кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең Татарстан Республикасы буенча идарәсенең Әлмәт, Зәй, Лениногорск, Сарман районнары территориаль бүлеге җитәкчесе Ринат Насыйбуллин сөйләде. Киңәшмә «Ел укытучысы» һөнәри бәйгесендә катнашу нәтиҗәләре буенча бүләкләү тантанасы белән тәмамланды.