Зәйдә 8 дистә елдан соң бүләк үз героен тапты
Бүген Зәйнең «Энергетик» мәдәният сараенда Сармаш-Баш авылында туып-үскән якташыбыз Кашапов Акмал Кашаповичны искә алу һәм хөрмәтләү чарасы узды. Ул 1941 елда Бөек Ватан сугышы башлангач ук яу кырында батырларча һәлак була, хәтта лаеклы бүләген алырга да өлгерми. Карелия фронтында күрсәткән батырлыгы өчен 52 нче укчы дивизиясе взводы командиры Акмал Кашапов Кызыл Байрак Ордены белән бүләкләнә, ләкин аны ала алмый кала, чөнки чираттагы биремне үтәгәндә һәлак була. Кызыл Байрак ордены таныклыгын Зәй муниципаль районы башлыгы Разиф Кәримов һәм район хәрби комиссары Айрат Әгъләмҗанов кулыннан геройның сеңлесе-тыл ветераны Гыйзденисә Миңнехуҗина алды. - Бөек Ватан сугышы югары дәүләт бүләгенә лаек булган абыегызның бүләген тапшыру бик куанычлы, - диде район башлыгы Гыйзденисә Миңнехуҗинага һәм барлык туганнарга мөрәҗәгать итеп. Ул аларга иминлек, сәламәтлек һәм тыныч күк йөзе теләде. Гыйзденисә Кашаповна, олы яшьтә булуына карамастан, җыелган халык алдында җавап сүзе белән чыгыш ясарга көч тапты, күз яшьләре аша энесе турындагы хатирәләре белән уртаклашты, шундый эчтәлекле чараны оештырган өчен зур рәхмәт белдерде. Чарада катнашучылар Ватанны азат итү һәм киләчәк буыннарның якты киләчәге өчен гомерләрен биргән барлык солдатларны бер минут тынлык белән искә алдылар.