Район башлыгы Разиф Кәримов машина төзүчеләр белән очрашты

Бүген «Аккурайд Уилз Русиа» ҖЧҖендә район башлыгы Р.Г. Кәримов катнашында хезмәт коллективы җыелышы узды. Анда предприятиенең 2021 нче елда башкарган эшләренә нәтиҗә ясалды, 2022 нче елга планнар билгеләнде. Башкарма директор И.С. Жустров сүзләренә караганда, 2021 елның гыйнварында җиңеләйтелгән тәгәрмәч җитештерү өчен технологик әзерлек ачылган. Алар белән "КАМАЗ", Daimler КАМАЗ РУС, VOLVO, МАЗ һәм башка йөк автомобильләре җитештерүчеләрен тәэмин итәргә планлаштыралар. Авырлыгы киметелгән көпчәкләр клиентларга файдалы йөкләнешне арттыру һәм ягулыкны экономияләү мөмкинлеге ача. Җиңел көпчәкләр Accuride ны инновацион продуктлар җитештерүче буларак танытачак. 2021 елның апреленнән Hyundai Solaris/Kia автомобильләре өчен җиңел көпчәкләр җитештерүне технологик яктан әзерләү проекты эшли башлады. Җиңел көпчәкләрне Hyundai конвейерына һәм башка җиңел автомобильләр җитештерүчеләргә 2023 елдан башлап китерү планлаштырыла. Район башлыгы Разиф Кәримов, үз чиратында, машина төзүчеләрне райондагы эшләрнең барышы белән таныштырды. Җыелыш бүләкләү тантанасы белән тәмамланды.