Зәйлеләр- кышкы ГТО буенча зона этабы җиңүчесе

19 февральдә Нурлат шәһәрендә 2022 елда Татарстан Республикасы халкы арасында «Хезмәткә һәм оборонага әзер» (ГТО) Бөтенроссия физкультура-спорт комплексы кышкы фестиваленең II (зона) этабы узды. Нурлат, Чирмешән, Зәй районнары командалары «Тулпар» спорт сараена җыелды. Катнашучыларны район җитәкчелеге исеменнән башкарма комитет җитәкчесенең социаль мәсьәләләр буенча урынбасары Ләйсән Нәфыйгина сәламләде. Тантаналы ачылыштан соң катнашучылар судьялар җитәкчелегендә нормативларны үтәүгә керештеләр. ГТОның кышкы фестивале программасына ике аяк белән этенеп урыннан озынлыкка сикерү, эскәмиядә басып торган җирдән алга авышу, аркада яткан җирдән гәүдәне күтәрү, биек арканда тартылу, гер ыргыту, идәндә яткан җирдән кулларны бөгү һәм турайту, чаңгыда йөгерү кебек сынаулар кертелгән. Һәр команданы 8әр кеше тәкъдим итте. Зәй районы командасы составына 9дан 55 яшькә кадәрге түбәндәге катнашучылар керде: Ревин Егор, Камалиева Амелия, Задавин Матвей, Борис Кирилл, Изосимов Максим, Задавин Андрей, Ревин Алексей, Козлов Максим. Ярыш нәтиҗәләре буенча, безнең команда ВФСК «ГТО» зона фестивалендә җиңүче булды.