Зәй егетләре командасы Мәктәп баскетболы төбәк финалында 2 нче урын яулады

20 февральдә Зәйдә «КЭС-Баскет» мәктәп баскетбол лигасы Чемпионатының региональ финалы тәмамланды. Идел буе федераль округы чемпионаты финалына беренче урын һәм юллама өчен егетләр командалары арасында Кукмара шәһәре күппрофильле лицей һәм Зәй шәһәренең аерым фәннәрне тирәнтен өйрәнүле 7 нче урта гомуми белем бирү мәктәбе егетләре көрәште. 58: 26 исәбе белән Кукмара баскетболчылары җиңү яулады. Зәй егетләре командасы икенче урынга чыкты. Кызлар командалары арасында алтын медаль өчен Түбән Кама шәһәренең 22 нче гимназиясе һәм Казан шәһәре Идел буе районының 83 нче лицее баскетболчылары көч сынашты. 83-нче номерлы лицей командасы җиңүче булды. Зәй кызлар командасы 8 команда арасында 4 урынны яулады. Ярышларда катнашучыларны, призерларны һәм җиңүчеләрне Зәй муниципаль районы башлыгы урынбасары Петр Сергеевич Уразайкин, Республика мәктәптән тыш эшләр үзәгенең Спорт секторы мөдире Лариса Гайсеевна Габитова, мәгариф идарәсе башлыгы Эрнст Рәис улы Сәфәргалиев һәм «КЭС-БАСКЕТ» мәктәп баскетбол лигасы төбәкләре белән эшләү менеджеры Юлия Широкова котладылар һәм бүләкләделәр.