Зәйдә шәһәрнең 370 еллыгын бәйрәм итү буенча чаралар планы төзелә

Бүген хакимият бинасының зур залында район башлыгы Разиф Кәримов катнашында Зәй шәһәре төзелүнең 370 еллыгын бәйрәм итүгә әзерлек буенча оештыру комитетының чираттагы утырышы узды. Ел дәвамында барлыгы 413 төрле дәрәҗәдәге һәм форматтагы чара үткәрү планлаштырыла. Бу хакта утырышта катнашучыларга район Башкарма комитеты җитәкчесе Эмиль Галиев җиткерде. Мәдәният, мәгариф, яшьләр эшләре, физкультура, спорт һәм туризм идарәләре башлыклары һәрберсе үз линиясе буенча планнары белән уртаклаштылар. Юбилей чараларына шәһәрнең эре предприятиеләре дә кушылачак. Зәй ГРЭСЫ, шикәр заводы директорлары, архитектура бүлеге башлыгы, шәһәр Башкарма комитеты җитәкчесе вазыйфаларын башкаручы шулай ук шәһәр юбилеена багышланган тантаналы чараларның ничек узачагы турында сөйләделәр. Планда район, республика, бөтенроссия, хәтта халыкара дәрәҗәдәге чаралар да бар, аларда төрле яшьтәге зәйлеләр, балалар бакчаларында тәрбияләнүчеләрдән алып, ветераннар, пенсионерларга кадәр да җәлеп ителәчәк. Рәзиф Галиевич оештыручыларны чараларны бөтен күңелне биреп оештырырга чакырды. Шәһәрнең юбилее матур да, эчтәлекле дә, матур мизгелләре, төзекләндерелгән территорияләр һәм яңа объектлар сафка бастыру белән истәлекле булырга тиеш.