Зәйдә сугышчы-интернационалистларны искә алдылар

Бүген Азатлык китерүче солдат һәйкәле янында якташларыбыз - хәрби локаль конфликтларда катнашучылар, мәктәп укучылары-яшьармиячеләр, шәһәр предприятиеләре, оешмалары һәм учреждениеләре хезмәткәрләре җыелды. 15 февральдә Совет гаскәрләренең соңгы колоннасы Әфганстан территориясеннән китүгә 33 ел тулды. Бу сугышта, үзенең интернациональ бурычын үтәп, 15 меңнән артык совет солдаты һәм офицеры һәлак булды. Әфганстанда сугыш хәрәкәтләре аша 10 меңгә якын татарстанлы үтте, 261 кеше һәлак булды, 570 кеше яраланды һәм контузия алды. Безнең республиканың 1744 кешесе хәрби орденнар һәм медальләр белән бүләкләнде. Зәй районыннан 211 якташыбыз Әфганстанга китте, 9 кеше әйләнеп кайтмады. -Без аларны хәтерлибез, без алар турында сөйләшәбез икән, димәк алар турында хатирәләр дә яши. Сугыш анда катнашкан кешеләр хәтерендә, анда үз улларын югалткан аналар йөрәгендә яши, һәм безнең бу турыда онытырга хакыбыз юк, - диде район башлыгы Разиф Кәримов. Ул Әфган сугышы, башка «кайнар нокталар» ветераннарына сәламәтлек, күңел күтәренкелеге теләде, киләчәктә дә яшь егетләр өчен батырлык үрнәге булырга һәм үсеп килүче буынга патриотик тәрбия бирүгә күбрәк игътибар бирергә чакырды. Истәлекле дата белән җыелган халыкны шәһәр хәрби комиссариатының гражданнарны хәрби хезмәткә әзерләү һәм чакыру бүлеге башлыгы Александр Гурьянов котлады. Митингта катнашучылар сугышчыларны бер минут тынлык белән искә алдылар һәм һәйкәлгә чәчәкләр салдылар.