Зәйдә чираттагы авыл хуҗалыгы ярминкәсе булды

Бүген «Энергетик» мәдәният сарае каршындагы мәйданда чираттагы, сезон башыннан унтугызынчы авыл хуҗалыгы ярминкәсе узды. Ярминкәдә Агросәнәгать паркының һәм җирле җитештерүчеләрнең авыл хуҗалыгы продукциясенең киң ассортименты тәкъдим ителде. Шәһәр халкына Вера Савгильдина, Алексей Кузнецов, Илдар Сәгыйтов фермер хуҗалыклары, Бигеш, Бохарай, Яңа Спас, Якты Күл авыл җирлекләре үз продукцияләрен тәкъдим итте. Зәйлеләр кулай бәяләрдән сөт продукциясе, бал, он, ярмалар, шикәр, кондитер, казылык әйберләре, ашлык, фураж һәм башка шәһәр кешеләре өчен кирәкле продукция сатып алдылар. Традиция буенча, беренчеләрдән булып сәүдә рәтләре буйлап, тәкъдим ителгән продукциянең ассортименты һәм сыйфаты белән танышып, район башлыгы Рәзиф Кәримов узды.