Район башлыгы машина төзүчеләрне якынлашып килүче Яңа ел белән котлады

Бүген район башлыгы Разиф Кәримов эш визиты белән «Аккурайд уилз Русия» ҖЧҖендә булды. Предприятиедә Разиф Галиевич завод директоры һәм хезмәт коллективы белән очрашты. Район башлыгы машина төзүчеләрне узып баручы елда районның социаль-икътисади үсеш күрсәткечләре белән таныштырды, киләчәккә куелган планнар хакында сөйләде, «Аккурайд уилз Русия» ҖЧҖнең район социаль-икътисади үсешендә ролен билгеләп үтте. Предприятиедә уртача хезмәт хакы 71 мең сум тәшкил итә, 2022 ел башына аның тагын чираттагы индексациясе көтелә. Разиф Галиевич коллективны узып баручы елның лаеклы тәмамлануы белән котлады, аларга нык сәламәтлек, гаилә иминлеге, җитештерү темпларын киләсе-2022 елда тагын да арттыруларын теләде. Үз чиратында башкарма директор Иван Жустров "Камаз" производство автомобиль җәмгыяте белән 5 елга килешүгә кул куелуы турында яхшы хәбәр җиткерде, ә бу исә киләчәктә заводта тотрыклы эш күләме һәм урыннары, лаеклы хезмәт хакы булачагын хәбәр итте. Шулай ук Иван Сергеевич якынлашып килүче Яңа ел белән котлады, җайга салынган эш өчен рәхмәт белдерде.