Район башлыгы энергетикларны һөнәри бәйрәмнәре белән котлады

22 декабрь - Энергетиклар көне. Бүген энергетика сәнәгате хезмәткәрләре үзләренең һөнәри бәйрәмнәрен билгеләп үттеләр. Шул уңайдан Зәй ГРЭСында тантаналы чара узды, анда район башлыгы Разиф Кәримов, «Татэнерго» АҖ генераль директорының стратегик үсеш буенча урынбасары Рим Галиәхмәтов катнашты. Традиция буенча, чара Зәй ГРЭСЫ эшенә йомгак ясау белән башланып китте. Коллектив алдында электростанция директоры Дмитрий Прохоров чыгыш ясады. Ул билгеләп үткәнчә, ел яхшы финанс һәм җитештерү күрсәткечләре белән тәмамланды. Рим Мозаффарович Зәй энергетикларына «Татэнерго» АҖ генераль директоры Рәүзил Хаҗиевның котлавын тапшырды. Район башлыгы Разиф Кәримов үз чыгышында билгеләп үткәнчә, быел Энергетиклар көне икеләтә тантаналы рәвештә уза. Бу яңа энергоблок төзелеше башлану белән бәйле. «Татэнерго» акционерлык җәмгыяте мөрәҗәгате буенча шәһәр төзелеше кодексы нигезендә, Зәй муниципаль районы администрациясе тарафыннан, «Татэнерго «АҖ филиалы-Зәй ГРЭСЫ 850 МВт куәтле пар-газ җайланмасы» объектын төзүгә рөхсәт бирелде. Разиф Галиевич Дмитрий Прохоровка яңа энергоблок төзелешенә рөхсәт тапшырды, коллективны һөнәри бәйрәмнәре белән котлады, барысына да нык сәламәтлек, гаилә иминлеге, аварияләрсез эш теләде. Тантаналы чара ахырында бер төркем алдынгыларга район башлыгының Мактау грамоталары, «Татэнерго»АҖнең Рәхмәт хатлары тапшырылды.