«Мөмкинлекләре чикле балаларда үз-үзләренә социаль ышаныч формалаштыру» онлайн семинар-практикумы

27 нче октябрь көнне Зәй шәһәренең «Тату гаилә» балалар бакчасында «Мөмкинлекләре чикле балаларда үз-үзләренә социаль ышаныч формалаштыру» дигән онлайн семинар-практикум булып узды. Анда Зәй, Казан, Яшел Үзән, Түбән Кама, Яр Чаллы, Әлмәт, Кама Аланы, Алабуга шәһәрләренең коррекцион балалар бакчалары педагоглары катнашты. Семинарның тематикасы актуаль, ул үсешендә кимчелекләре булган балаларны тәрбияләү һәм укытуның заманча алымнарын чагылдыра. Мондый мөһим тема барлык катнашучылар тарафыннан профессиональ һәм ышандырырлык итеп ачылды. Семинар күп планлылыгы белән аерылып торды, белгечләр катнашучыларга белемнәрен баетырга һәм эш алымнарын, формаларын киңәйтергә ярдәм итүче күнекмәләр бирделәр. Семинарда тәкъдим ителгән материаллар мәктәпкәчә белем бирү учреждениеләре педагогларына балалар белән эшләүдә, сәламәтлекләре чикләнгән балаларны тәрбияләү һәм укытуда яңа идеяләр һәм алымнар эзләргә ярдәм итәчәк.