Зәй комбайнчылары -“Хезмәт кешесенә дан” республика бәйгесе җиңүчеләре

22-23 октябрьдә Кукмара муниципаль районының Яныль авылында яшь комбайнчылар арасында “Хезмәт кешесенә дан” дигән 13 нче республика конкурсы җиңүчеләрен бүләкләү тантанасы узды. Оештыручылар - Татарстан Республикасы авыл хуҗалыгы һәм азык-төлек министрлыгы, Татарстан Республикасы мәгариф һәм фән министрлыгы, «Татарстан» ДТРК, Казан дәүләт аграр университеты. Чарада Татарстан Республикасы Дәүләт Советында «Бердәм Россия» фракциясе җитәкчесе урынбасары Римма Ратникова, Татарстан Республикасы Дәүләт Советының экология, табигатьтән файдалану, агросәнәгать һәм яшьләр сәясәте комитеты рәисе Азат Хамаев, Татарстан Республикасы авыл хуҗалыгы һәм азык-төлек министры урынбасары Илдус Габдрахманов һәм башкалар катнашты. “2010 һәм 2021 еллар температура күрсәткечләре, продуктив дым җитмәү буенча шактый охшаш. Шулай да, без быел 2010 нчы корылык елындагыга караганда 3 тапкыр күбрәк уңыш җыя алдык. Димәк, безнең көчебез арткан, технологияләр инновационрак була башлаган, сезнең кебек сәләтле кадрлар барлыкка килгән”, - дип мөрәҗәгать итте яшь механизаторларга Илдус Габдрахманов. 13 ел эчендә "Хезмәт кешесенә дан" телевизион конкурсында 400гә якын яшь комбайнчы катнашты. Беренче көнне таләпчән жюри аларның теоретик һәм практик күнекмәләрен бәяләде, финалга иң-иңнәре чыкты. Зәй районы данын "Зәй" агрофирмасыннан комбайнчылар Рөстәм Мөхәммәтдинов и Риназ Закиров экипажы яклады һәм алар «Иң яхшы теоретик белемнәр» номинациясендә җиңүче булып танылды. Егетләргә алдагы эшчәнлекләрендә уңышлар телибез.