Зәйдә ораторлык осталыгы буенча мастер-класс узды

2021 елның 22 октябре, җомга
Казан мәдәният институты укытучылары зәйлеләргә халык алдында уңышлы чыгыш ясау серләрен аңлаттылар. Бүген «Энергетик» мәдәният сараенда зәйлеләрне татар телендә халык алдында чыгыш ясау сәнгатенә өйрәтү булды. Татарстанда туган телләр һәм Халыклар бердәмлеге елы кысаларында узган чараны Казан дәүләт мәдәният институты укытучылары алып барды. Педагогика фәннәре кандидаты, Татарстан Республикасының атказанган мәдәният хезмәткәре, сәхнә сөйләме һәм дикторлык осталыгы буенча белгеч, Казан дәүләт мәдәният институты доценты Илсөяр Шиһапова чыгыш ясауга әзерлек турында сөйләде: ничек дөрес текст төзергә һәм аудиториянең игътибарын югалтмаска. Татарстанның атказанган артисты, актер, режиссер, актерлык осталыгы һәм режиссурасы буенча белгеч, Казан дәүләт мәдәният институты доценты Азат Зарипов зәйлеләргә сәхнәгә чыгар алдыннан эмоциональ киеренкелекне бетерү алымнарын күрсәтте. Сәхнә сөйләме буенча белгеч, педагогика фәннәре кандидаты, Казан дәүләт мәдәният институты доценты Земфира Ибәтова тамашачыларга дикция өстендә эшләү буенча берничә гади күнегү күрсәтте. Ул тагын бер тапкыр татар авазларын дөрес әйтү мөһимлеге турында искә төшерде. Татарстан Республикасының атказанган сәнгать эшлеклесе, актерлык осталыгы һәм режиссура буенча белгеч, актер, режиссер, язучы, Казан дәүләт мәдәният институтының өлкән укытучысы Раушан Шәриф сәхнәдә тынычлыкны саклау серләре белән уртаклашты. Татарстанның атказанган артисты, музыкант, Казан дәүләт мәдәният институтының өлкән укытучысы Әлфис Галиуллин, гармунда уйнап һәм җырлап, чарага үзенчәлек өстәде. Укуның икенче өлешендә мастер-класслар узды, анда зәйлеләр аудитория алдында үз-үзеңне дөрес тоту алымнарын практикада өйрәнделәр. Зәй районы башлыгы урынбасары Петр Уразайкин укытучыларга кирәкле һәм кызыклы шөгыльләре өчен рәхмәт белдерде. Республика районнарында ораторлык сәнгате буенча дәресләр Татарстан Республикасы Президенты Рөстәм Миңнеханов, шулай ук татар телен саклау һәм үстерү мәсьәләләре буенча Татарстан Республикасы Президенты каршындагы комиссия рәисе Марат Әхмәтов ярдәмендә үткәрелә.
ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International