Үзәк китапханәдә «Әдәпле фәннәр мәктәбе» этикет сәгате үтте

Кеше үз вакытының күп өлешен урамда, транспортта, җәмәгать урыннарында, эштә һәм уку йортларында үткәрә. Җәмгыятьтә яхшы тәртип кагыйдәләрен үтәү юл хәрәкәте кагыйдәләрен үтәү кебек үк зарур. «Кеше. Закон. Хакыйкать» клубы кысаларында «Әдәпле фәннәр мәктәбе " дип аталган этикет сәгатендә 4 нче урта мәктәпнең 8 нче сыйныф укучылары үз-үзеңне тоту кагыйдәләре турында бик күп файдалы мәгълүмат алдылар. Балалар зур кызыксыну белән этикет тарихы, аның төрле илләрдәге үзенчәлекләре турында тыңладылар, «Аралашу серләре» һәм «Этикет кагыйдәләрен беләсезме?» дигән викторина сорауларына җавап бирделәр. Сораулар көндәлек тормыш хәлләреннән чыгып төзелде: кемгә «Сәлам» дип әйтергә була, нинди очракларда хатын-кыз беренче булып исәнләшә һәм башкалар. Мәктәп укучылары да аралашу нинди күңелле булырга мөмкин икәнлеген аңладылар. Балалар рәхәтләнеп «үз-үзеңне тотуның 15 кагыйдәсе» видеосын һәм «Ералаш» чыгарылышын карадылар.