Зәй аграрийлары чөгендер алуга кереште

22 августта Зәй аграрийлары татлы тамыр-чөгендер алуга кереште. Район басу-кырларында быел ул барлыгы 9166 гектар мәйдан били. Ел үзенчәлекле килү сәбәпле, уңыш гектарыннан 180-200 центнер тирәсе. Әлеге эшкә “Зай” агрофирмасыннан керешелде, биредә уңыш гектарыннан 230 центнер. “Восток”та ул күрсәткеч - 160 . Әлеге агрофирмалар чөгендерне шикәр заводына ташый башлады. Шикәр заводы өзлексез эшләсен өчен, агрофирмаларга чөгендер казу буенча план–бирем бирелде. Ул тәүлегенә “Зай” агрофирмасына -1725, “Восток”ка 1500 тонна. Кичә завод 900 тонна чөгендер кабул итте. Шикәрлелек - 19,5 процент, пычраклылык 14,5 проценттан күбрәк. “Зәй шикәре” агрофирмасы исә заводка чөгендерне Нариманов урамындагы күпер ачылгач ташый башлаячак. Шикәр кайнату сезоны 26 августта башланачак.