Район башлыгы авыл хуҗалыгы бүлекчәләрендә булды

Бүген район башлыгы Р.Г. Кәримов районның авыл хуҗалыгы һәм азык-төлек идарәсе һәм агрофирмалары белгечләре катнашында авыл хуҗалыгы бүлекчәләрен йөреп чыкты. Сәфәрдә катнашучылар арпа басуларында урып-җыюның барышы, көзге культуралар өчен туфракны төп эшкәртү һәм әзерләү агрегатларының эше, «Восток» агрофирмасының Александровская Слобода, Яңа Спас, Бохарай, Сармаш бүлекчәләрендә, «Зәй» агрофирмасының Алга, Кадер, Нур бүлекчәләрендә сидераль парларга кошлар тизәге кертү белән таныштылар. Бүген август башы гына булуга карамастан, туфракны төп эшкәртү 16 мең гектарда башкарылды, бу исә пландагы 55 мең гектарның 30% ын тәшкил итә. Шулай ук Дурт -Мунча, Куш-Елга, Югары Шепкә һәм Сарсаз-Баграж сөт комплекслары һәм товар фермаларында терлек азыгы, салам әзерләү барышы белән таныштылар. Бүгенге көндә җитәрлек күләмдә сенаж әзерләнгән инде, ул 32,7 мең тонна тәшкил итә, салам пресслау, ташу һәм эскертләу эшләре дәвам итә. Терлекчелек продукциясе җитештерү, аерым алганда, сөт җитештерү мәсьәләсе аерым игътибар үзәгендә. Район терлекчеләре тәүлегенә 80.4 тонна сөт савалар, бу узган елгы күрсәткечтән 7 тоннага күбрәк. Бер сыердан 17,5 кг сөт савып алына. Алар алдына планга куелган күрсәткечләргә – бер сыердан тәүлегенә 20 кг сөт савып алуга ирешү бурычы куелган. Терлекчеләр белән очрашу вакытында район башлыгы Дурт-Мунча, Куш-Елга, Югары Шепкә һәм Сарсаз - Баграж фермалары коллективларына нәтиҗәле хезмәтләре өчен рәхмәт белдерде, киләчәктә дә уңышлар теләде.