Зәйдә һава-десант гаскәрләре көне билгеләп үтелде

Бүген Россиядә һава-десант гаскәрләре көне билгеләп үтелә. Әлеге бәйрәм кысаларында 2 нче парктагы һава сугышчылары һәйкәле янында традицион митинг оештырылды. Сәламләү сүзе белән десантчыларга Зәй муниципаль районы башлыгы урынбасары Петр Уразайкин, хәрби хезмәткә чакыру бүлеге башлыгы Александр Гурьянов, “Сугышчан туганлык” хәрби берләшмәсенең Зәй бүлекчәсе рәисе Сергей Хватков, “Юнармия” Зәй бүлекчәсе штабы башлыгы Александр Ширяев мөрәҗәгать итте. “Кыңгырау” балалар бакчасында тәрбияләнүчеләр бию һәм спорт номерлары белән сөендерделәр. Берәүләр бүгенге көндә канатлы пехотада горурланып хезмәт итсә, икенчеләр - инде мактаулы ветераннар. 90 ел элек, 1930 елның 2 августында, Мәскәү хәрби округының Воронеждагы өйрәнүләрендә, беренче тапкыр парашютларда 12 кешедән торган десант бүлекчәсе сикерә. 1932 елда авиадесант частьлары формалаша башлый. Шушы вакыт эчендә Россия десантчылары укыту-хәрби хәрәкәтләрдә зур тәҗрибә тупладылар... Традицион рәвештә бу көнне десантчылар Азатлык китерүче солдат һәйкәленә чәчәкләр салды. Ә аннары оешкан рәвештә һәлак булган десантчыларның каберләрен зыярәт кылдылар.