Зәйдә М.Ю. Лермонтовны искә алдылар

27 июль көнне Үзәк китапханәдә ишегалды лагере балалары өчен бөек рус шагыйре Михаил Юрьевич Лермонтовның үлүенә 180 ел тулу уңаеннан «Поэзии чудесный гений» дип исемләнгән әдәби сәгать үткәрелде. Лермонтов кыска гына гомер юлы үткән, әмма зур әдәби дөнья булдырырга өлгергән. Тулы булмаган 27 ел эчендә ул гаҗәеп күп иҗат иткән: «Маскарад» трагик пьесасы, «Безнең заман герое» романы, 30лап поэма, 400 дән артык шигырь. Шагыйрьнең язмышы, чыннан да, фаҗигале: әнисенең иртә үлеме, әтисеннән еракта узган балачак, гомеренең соңгы елларында сәяси эзәрлекләүләр... Шуңа да карамастан, ул тормышны яраткан, туган ил турындагы уйлар белән, ирек турында хыялланып, батырлыкка омтылып, дәртләнеп яшәгән. Китапханәче белән бергә балалар шагыйрьнең тормыш юлы буйлап сәяхәт кылдылар, М.Ю. Лермонтов тормышының аерым этаплары, күп кенә танылган әсәрләрнең барлыкка килү тарихы белән таныштылар, шагыйрьнең иҗаты буенча әдәби викторинада актив катнаштылар, яраткан әсәрләреннән өзекләр укыдылар. Лермонтовның шигырьләре һәрвакыт җиңел укыла, тиз истә кала. Шулай ук балалар игътибарына язучының әсәрләре буенча нәфис фильмнардан өзекләр һәм «Приветствую тебя, Кавказ седой» дигән видеоальбомыннан өзекләр тәкъдим ителде. «Поэзии чудесный гений» дигән китап-иллюстратив күргәзмә әлеге теманы мәгълүмати яктан баетучы булды. М. Лермонтов рус шигъриятендә онытылмас эз калдырды. Бөек шагыйрьнең шигырьләре хәзерге вакытта да яшьләр күңелендә яши.