Зәй туган якны өйрәнү музеенда Россия хәрби-диңгез флоты көненә багышланган чара узды

Июльнең соңгы якшәмбесендә Россия хәрби-диңгез флоты көне билгеләп үтелә, чөнки безнең ил - бөек диңгез державасы. Көнбатыш һәм көнчыгышта, төньякта һәм көньякта аның территориясен өч океан бассейнына караган унике диңгез һәм ике эчке диңгез сулары юа. Тормышын диңгез белән бәйләү һәркемнең кулыннан килми, чөнки диңгезчеләр һәм су асты көймәләрендә хезмәт итүчеләрнең эше стихия белән бәйле, ә анда барысы да кешедән генә тормый. 22 июльдә туган якны өйрәнү музеенда «Диңгезләр, флотлар буйлап» танып-белү программасы үткәрелде. Анда диңгезчеләр: Латыйпов Фәрит Миңнехарис улы - Тын океан флоты капитан – лейтенанты; Атласов Валентин Александрович-икенче ранг капитаны, Төньяк Боз океанында хезмәт иткән; подполковник Афанасьев Александр Николаевич тормыш иптәше Рәкия Габбазовна белән, аларның уллары Виталий һәм Артур Тын океан флотында хезмәт итәләр, чакырылган иде. Кунаклар өчен район мәдәният йортының «Дейли» бию - хореография коллективы «Яблочко» биюе белән чыгыш ясады. Программа барышында балалар диңгез викторинасында катнаштылар, диңгезченең нинди сыйфатларга ия булырга тиешлеген ачыкладылар. Кунаклар аларга диңгез төеннәрен бәйләү ысулын күрсәттеләр, бергә алар пазлда качырылган диңгез техникасы төрләрен билгеләделәр. Укучылар Фәрит Миңнехарис улының «Лунь» сак кораблендә Камчаткада хезмәт итүен, аның озынлыгы 91 метр, ә киңлеге 10 метрдан артык булуын белделәр. Валентин Александрович крейсерларда хезмәт иткән, «Александр Невский 2» һәм «Петр Великий» — РФ Хәрби-диңгез флоты авыр атом ракета крейсеры, аның беренче һәм соңгы суднолары булган. Аның максималь озынлыгы 250 метрга җитә, ә биеклеге -59 метр. Балалар морякларны сораулар белән күмделәр, кортикны тотып карый һәм аның номерын күрә алдылар. Чарада катнашучыларга истәлек өчен рәхмәт хатлары тапшырылды.