Зәйдә Асфальтта рәсем ясау көнен билгеләп үттеләр

Асфальтта рәсем ясау көне кысаларында С.Рафыйков исемендәге Үзәк китапханәдә ишегалды лагере балалары өчен «Без асфальтта рәсем ясыйбыз» дигән җәйге бәйрәм үткәрелде. Кешелек тарафыннан күп кенә гадәти булмаган һәм мавыктыргыч бәйрәмнәр уйлап табылган. Алар тирә- юньдәгеләр өчен көндәлек мәшәкатьләрдән арынып торырлык шатлыклы чаралар оештырырга мөмкинлек бирә. Шундый бәйрәмнәрнең берсе 16 июльдә билгеләп үтелә торган Асфальтта рәсем ясау көне. Бу көнне теләгән әйберне ясарга рөхсәт ителә. Асфальтта үз хыялыңны яки уртак теләкләреңне сүрәтләп була. Бу бәйрәм шулай ук хәтердән начарлыкны, көенечне юарга мөмкинлек бирә. Уен формасында күңелле көй астында балалар бер-берсен кулга-кул тотынып сәламләделәр, кочаклаштылар һәм бер-берсенә елмайдылар. Катнашучылар өчен китапханәче күңелле конкурслар үткәрде: табышмаклар чиштеләр, эстафеталарда катнаштылар, асфальтта акбур белән рәсем ясадылар. Китапханәнең яшь кунаклары төсле акбурлар белән чәчәкләр, күк, кояш, салават күпере һәм башка бик күп нәрсәләр төшерделәр. Бәйрәмдә катнашучылар тырышлыгы белән асфальт сәнгать әсәрләренә әйләнде. Барлык рәсемнәр дә якты, кызыклы, ә иң мөһиме – игелекле булып чыкты. Чара күңелле биюләр белән тәмамланды, балалар татлы призлар алдылар