Зәйлеләрне Питрау бәйрәменә чакыралар

Питрау бәйрәме бүген Кашкатау итәгендә узачак. Бәйрәм 17 сәгатьтә район башлыгы Р.Г.Кәримов катнашында керәшеннәрнең фольклор коллективлары чыгышы һәм тантаналы ачу белән башланып китәчәк. Кич буе бәйрәм кунакларын татар эстрадасы артистлары - «Агыйдел» дәүләт җыр һәм бию ансамбле, Җәвит Шакиров, Виталий Агапов, Марина Карпова, Вадим Захаров, Роберт Андреев һ.б. иҗади чыгышлары белән сөендерәчәк. Артистларның чыгышы 18 сәгатьтән көтелә. Шул ук вакытта спорт, тематик мәйданчыклар эшләячәк, балалар уеннары, аттракционнар оештырылачак. Моннан тыш, район халкы һәм кунаклары милли уеннарда, суда (себеркеләр белән сугыш, колга белән авыш) конкурсларда катнаша ала. 18 сәгатьтә балалар мәйданчыгында керәшен җырының балалар вокаль конкурсы башлана, аны концерт-уен программасы дәвам итәчәк. 19 сәгатьтә кече сәхнәгә "Питрау чибәре - 2021" конкурсантлары чыгачак. 20 сәгатьтә «Ак дәдәй» конкурсы, 21 сәгатьтә «Моңлы тавыш 60+» конкурсы башлана. Бәйрәм 22 сәгатьтә бәйрәм учагы белән тәмамланачак.