Зәйдә Татарстан Республикасы архив эше буенча дәүләт комитеты күчмә утырышы узды

Бүген Зәйдә Татарстан Республикасының Архив эше буенча Дәүләт комитеты коллегиясенең "2021 елның беренче яртыеллыгында муниципаль архивларның эшчәнлеге нәтиҗәләре"дигән темага күчмә утырышы үткәрде. Ул “Татарстан Республикасы Зәй муниципаль районы мисалында архив документларының сакланышын тәэмин итү" республика семинар-киңәшмәсе буларак узды. Анда республиканың район, шәһәр Советлары аппаратлары җитәкчеләре, Башкарма комитетларның архив бүлекләре башлыклары, коллегия әгъзалары, Дәүләт комитеты һәм Татарстан Республикасы Дәүләт архивы җитәкчеләре һәм белгечләре чакырылган иде. Чарада Зәй муниципаль районы башлыгы Разиф Гали улы Кәримов, Татарстан Республикасының Архив эше буенча Дәүләт комитеты рәисе Гөлнара Зәкәрия кызы Габдрахманова катнашты. Семинарның пленар өлешенә кадәр анда катнашучылар, өч төркемгә бүленеп, муниципаль һәм ведомство архивларында булдылар, "Челтәр компаниясе" АҖ Зәй филиалы архивының эшчәнлеге белән таныштылар. Зәй муниципаль районы архивы 2017 елда капиталь ремонт үткәрелгән яңа бинага күчерелде. Ул республика бюджеты хисабына ремонтланды. Хәзер биредә эшчәнлек өчен яхшы шартлар тудырылган. Архивта заманча технологияләр кулланыла. Тиздән ведомство архивын төп реконструкцияләү эшләре төгәлләнәчәк. Аны җиһазландырасы гына калды. Биредә Башкарма комитетның Идарә, бүлекләре һәм башка муниципаль структураларның документларын саклау өчен иң яхшы шартлар тудырылачак. Семинарда катнашучылар өчен "Энергетик" Мәдәният сарае мәйданчыгында презентацияләр һәм тематик күргәзмәләр оештырылды. Район башлыгы Разиф Кәримов үзенең сәламләү сүзендә киңәшмәдә катнашучыларны районның социаль-икътисади үсеше белән таныштырды. Район башкарма комитетының архив бүлеге башлыгы Рәмзия Шатунова Зәйдә архив документларының сакланышын тәэмин итү эшчәнлеге турында доклад белән чыгыш ясады. Зәй үзәк район хастаханәсе баш табибы Айдар Фатыйхов бу эшнең район үзәк хастаханәсендә ничек куелуы турында сөйләде. Гөлнара Габдрахманова республика муниципаль архивларының агымдагы елның беренче яртыеллыгында барлык юнәлешләр буенча эшчәнлеген анализлады. Ул шулай ук 2020, 2021 елларда муниципаль архивларга ярдәм итү максатыннан игълан ителгән грантлар бәйгесендә җиңүчеләргә бүләкләр тапшырды. Семинарда эшчәнлекнең төрле юнәлешләре буенча берничә мәйданчык оештырылды. Аларда мастер-класслар күрсәтелде, "реликвия" генеалогик порталы тәкъдим ителде.