Зәйдә «Безнең ил» этнорэссамнарының республика пленэры узды
30 июньдә С. Рәфыйков исемендәге Үзәк китапханәдә «Безнең ил» («Безнең төбәк») этнорәссамнарының республика пленэрын ачу тантанасы булды. Пленэрның максаты-мәдәни һәм иҗади элемтәләрне ныгыту һәм үстерү, сынлы сәнгатьне популярлаштыру һәм керәшеннәр турында сәнгать әсәрләрен булдыру, Зәй җирендә матур фонд булдыру. Зәй районы-ул уникаль табигате, мәдәнияте һәм тарихи һәйкәлләре, халыкның рухи хәзинәләре төбәге. Рәссамнар алдында катлаулы бурыч тора – керәшен авылы рухын, анда яшәүчеләрнең образларын рәсем аркылы курсәтү. Республика пленэрын ачуда Зәй муниципаль районы башлыгы урынбасары Петр Уразайкин, Татарстан Республикасы керәшеннәр иҗтимагый оешмасы идарәсе әгъзасы Григорий Максимов, Татарстан Республикасы Рәссамнар берлеге рәисе Альберт Шиабиев, Татарстан Республикасы Рәссамнар берлеге әгъзалары Мөдәрис Минһаҗев, Илдус Вәхитов, Әлфия Нурхәмәтова катнаштылар. Проект кысаларында иҗат ителгән сәнгать әсәрләре уникаль тарихи архивны булдыру өчен нигез булачак.