Зәйдә начар ишетүче кешеләр өчен аралашу клубы эшли

Зәй муниципаль районы “Шатлык” халыкка социаль хезмәт күрсәтү комплекслы үзәгендә ишетмәүчеләр, начар ишетүче кешеләр һәм аларның гаилә әгъзалары өчен “Поддержка” аралашу клубы эшли. ”Поддержка” клубы эше «Шатлык» социаль ярдәм үзәгенең 2020 елда социаль әһәмиятле проектларны гамәлгә ашыруда катнашучы коммерцияле булмаган оешмалар арасында Татарстан Республикасы Министрлар Кабинеты грантларын алуга республика конкурсында җиңүгә ирешүе нәтиҗәсендә тормышка ашырыла. “Поддержка” клубында тематик кичәләр, конкурслар, спорт эстафеталары, педагоглар, психологлар белән дәресләр, юристлар, табиблар һәм башка белгечләр белән очрашулар оештырыла. Клубта чираттагы очрашу 8 апрельдә узды, анда сурдотәрҗемәче һәм “Поддержка” клубы җитәкчесе Мөхәммәтшина Римма Анатольевна конкурслар, мәзәкләр һәм мастер-класслар белән тулы бер күңел ачу-танып-белү программасы уздырды. Клуб әгъзалары җитезлек һәм реакция буенча көч сынаштылар, уеннарда катнаштылар һәм аралаштылар. Балалар өчен уен һәм сенсор бүлмәләрендә дәресләр узды, шулай ук Римма Анатольевнаның кызы Айсылу футболкалар ясау буенча мастер-класс үткәрде. “Поддержка” клубында катнашучылар үзләре бу клубның алар өчен бик мөһим һәм кыйммәтле булуын таныйлар, чөнки биредә алар Римма Анатольевна һәм “Шатлык” үзәге белгечләре ярдәмендә үзара аралашып кына калмыйча, үзләре өчен бу дөньяны яңа яктан ачып, аның белән хезмәттәшлек итәргә өйрәнәләр.